布袋國中營養午餐 逐禮拜三免費加菜添菜色
發布時間：
更新時間：
佇嘉義鰲鼓濕地邊仔的布袋國中，全校有百外名學生，學校為欲來照顧當咧大漢的學生囡仔，逐禮拜三攏會共學生加菜，而且閣毋免另外抾錢。學生表示，一禮拜當中上期待就是拜三，因為會食佮真腥臊。
食中晝的時間，學生共中晝頓扛轉來教室，逐家排隊貯菜。嘉義縣的布袋國中，驚當咧發育的學生食袂飽，逐禮拜三，攏另外替學生加菜。
嘉義縣布袋國中蘇同學：「拜三的菜色有誠濟種，比拜一、拜二、拜四、拜五閣較濟，親像有雞排、雞腿，閣有一寡燒賣啥物的」。
學校表示，遮的囡仔當咧轉大人，需要卵白質，學校特別共儉落來的經費用來替學生加菜，一方面是照顧學生，一方面嘛減少家長的負擔。
嘉義縣布袋國中校長吳敏男：「經費的來源，是對阮中晝頓專戶的結餘款，阮希望囡仔所納的營養午餐費用，是專款專用，就用佇咧囡仔的加菜金頂頭，所以阮拜三的加菜，是完全毋免向家長收錢」。
嘉義縣布袋國中紀同學：「希望有閣較好食的菜色，像講是雞腿這類的物件」。
一个湯、三項菜，有時陣閣會有學生佇學校內底種的菜，目前逐禮三攏會當有加菜的機會，猶毋過學校表示，偏鄉的資源無法度佮都市相比並，而且相關的成本嘛較懸，雖然教育部佮縣政府，攏有補助，但是最近物價愈來愈懸，嘛是會煩惱營養午餐業者明年經營的態度，敢會影響著偏鄉學校的囡仔。
