論核四塗跤底斷層 學者:若地動.按怎補強攏無效

針對核四廠的議題,今仔日環保團體佮臺大地質學者陳文山等人開記者會,表示反對核四廠重紡,認為廠區下跤除了有S斷層,外海也有活動斷層;準若發生地動,就算核四廠閣按怎補強攏無效。毋過,公投𤆬頭者黃士修表示,已經有足濟證據顯示S斷層毋是活動斷層,伊也批評學者是咧欺騙民眾。

臺灣大學地質科學系教授陳文山:「全世界無像核四廠這種遮䆀的條件,接近活動斷層。伊的廠房內面閣有2條遮大的斷層佇內面。」

閣一改表態反對核四重啟,台灣大學地質科學系教授陳文山提出台電引用中央地質調查所2009年的報告,表示核四廠外海活動斷層有90外公里長,而且廠區下跤的S斷層長度至少2公里,學者表示雖罔猶袂證實是有活動性,不過地殼若受地動震動,核電廠就算補強,也完全無效。

中央大學應用地質研究所教授李錫堤:「我佇遮講無法度補強,彼个斷層向地下延伸至少十公里。十公里後地殼若一震動,你頂懸的紅毛塗閣較厚;你講圍阻體兩公分的紅毛塗,完全無路用。」

核四公頭領銜人黃士修:「逐工跳針北部核四廠,S斷層阮已經有足濟證據,攏是非活動斷層。你欲做進一步的地質調查也會使,但是拜託這寡反核學者,莫用地質教授的銜頭,講阮無排除、無確定。我真正感覺這是一種學術欺騙,這是欺騙社會大眾的行為。」

核四廠敢安全,正方反方繼續攻防,不過核四這陣封存,針對廠區下跤S斷層,敢欲進一步做地質鑑定?台電表示這陣猶無收著指示。

相關新聞

專題|全台敬老金大調查