整修3冬外 旗津天后宮今重開廟門.入火安座
陳嘉筠 賴威佐 / 高雄報導
發布時間：
更新時間：
已經有348年歷史的旗津天后宮，經過三年外的整修，這馬已經修復完成，入火安座。這間廟毋但是當地信仰中心，嘛是珍貴的文化資產。
廟埕真濟信徒，廟內廟外攏真鬧熱，經過三冬外整修，旗津天后宮重新開廟門，開基媽祖等等神尊，完成入火安座。
這是地方的大代誌，因為旗津天后宮，是高雄第一間媽祖廟，建廟已經348年，規間廟有誠濟民間藝術，這擺修整，毋但建築的結構佮厝頂，包括剪黏佮廟內各種彩繪嘛有修復。
旗津天后宮主委，陳冠銘表示：「石雕原來有上色彩繪，文資委員提議之下，後期加固物件拔落來、去除，予伊轉去古蹟本身。」
為著保存古蹟，廟方佮文化部、高雄市政府合作，經費將近欲五千萬，嘛特別邀請四位台灣傳統工藝國寶級的師傅，來參與修復工課。
旗津天后宮主委，陳冠銘表示：「這遍整修佮頂一次整修，已經相差七十三年，這个意義毋但是古蹟維護，更加是媽祖信仰的傳承。」
主委表示，修復完成，向望媽祖婆繼續守護人民，𪜶紲落來欲爭取天后宮升格國定古蹟。
2022杭州亞運 台灣百金之路
