傳統技藝結合新科技 布袋戲尪仔愈變愈鑠奅

用電動遙控的方式，布袋戲尪仔隨振動起來，原來尪仔內底有鬥電動枝骨，每一个動作，攏是透過學生手中的遙控器去控制。

陽明交通大學應藝所聯展總召 陳昱誠講，「透過遙控手扞仔坐佇台跤參觀眾互動，仝時陣透過手扞仔控制布袋戲尪仔，來完成表演。」

閣有這是利用VR佮AR技術，手囊仔掛好勢，指頭仔振動一下，電視內底的布袋戲就會當完成幾若項困難的動作。

陽明交通大學應藝所長 許峻誠講，「利用AR VR的技術閣有手勢，免直接摸著布袋戲尪仔，阮就會使弄布袋戲。」

學生講，透過展覽，除了佇設計過程中學著科技，嘛閣較熟似傳統的布袋戲文化。

設計團隊學生講，「布袋戲本身是真有韻味的歷史文化，阮攏感覺對台灣來講，是非常重要的財產。」

團隊嘛專工去拜訪資深的布袋戲藝師，記錄老師弄布袋戲尪仔的動作，希望每一步攏會當完美展現出來。