鳳山國有地租人起太陽光電 居民反對促撤回

鳳凰山跤這塊一公頃外的空地，業者已經請怪手整地，這塊國有地未來欲起太陽能光電，煞引起附近徛家民眾的不滿，里民做陣搝布條反對。

當地居民表示：「無贊成啦，伊對人的身體按怎樣，毋捌矣」、「這个田是滯洪池，對日本時代就作田到這馬，為啥物政府會租予人做太陽能，破壞環境，日後造成淹水欲按怎樣」

居民不滿業者剉樹仔，而且若是起光電枋，佮邊仔這排徛家才隔一條六米的巷仔，序大攏驚影響健康，里長認為國產署佮業者攏無尊重地方，希望市府會當撤銷這个案。

誠智里長黃桂花表示：「我講里民有疑慮，伊真強勢講伊無來開說明會的必要」

高市府經發局公共事業科長魏建雄指出：「彼爿無禁限建的規定，依法佇110年3月核准計畫，阮嘛有提醒廠商，愛做好敦親睦鄰」

面對民眾反對，國產署強調，尊重地方佮市府意見，若是認定無適合開發，in會收回土地，里長佮里民是希望，空地會當做滯洪池公園抑是停車場，才是解決地方問題。