衛武營解封大戲 "光華之君"改編日本文學演出

唐美雲歌仔戲團的《光華之君》,今年有入圍傳藝金曲獎六个獎項。這个拜六、禮拜,特別佮高雄市國樂團合作,欲佇衛武營歌劇院演出,予觀眾朋友來去先看先贏。

唐美雲扮演的光華君,風流緣投,佮袂少女子攏有感情牽連。《光華之君》這齣戲改編日本古典文學《源氏物語》,描寫作家藤夫人佮伊的愛人仔,閣有伊寫的小說主角光華君的愛情故事,現實佮冊中虛幻相替換,規齣戲不管是音樂、舞台、燈光效果,攏跳脫傳統的歌仔戲。

唐美雲歌仔戲團藝術總監唐美雲講,「我會記得演出到最後一場,兩个人攏哭甲目屎四淋垂,我想阮攏予劇中人感動,而且感動劇中人人生,有重新無仝的選擇。」

欲按怎共原文有百萬字的文學,改編成一百五十分鐘的歌劇,考驗編劇佮導演,而且劇中扮演藤夫人的黃宇琳原本是京劇演員,伊講用台語唱歌仔戲是上大的挑戰。

演員黃宇琳講,「in攏盡量佮我講台語,佇排練場只要聽著,若是我咬字有無到位的,攏會提醒我,攏是我排練場的老師。」

《光華之君》今年入圍傳藝金典獎六項大獎,進前因為疫情,暫停演出,這擺佇衛武營,嘛是解封過後頭一擺巡演,拜六佮禮拜兩工的票攏已經賣了矣。


 

全台敬老金大調查

相關新聞