嘉義市遊民收容所徛起77冬 今成做地方創生基地

建築師共師父討論空間修復的細節，這間1943年起的遊民收容所，內底閣看會著當初關人的所在，負責修復的建築師表示，欲共舊的物件，加上新的元素。

建築師張先生表示：「阮想講這是一个新的機會，佇咱這个時代做一个新的厝尾頂，這个厝尾頂用彼種較開放的方式，予原本是關起來的門共拍予開，一間厝變兩間厝。」

遮過去捌是地方煉瓦hiā會社的辦公廳，二戰了後成做關逃兵、收容傳染病人的所在，嘉義市政府開兩冬外修整，這馬已經完工。

嘉義市長黃敏惠表示：「透過文化部再造歷史現場的計畫，阮共這个所在拍開，進行一个誠好的修繕。這个誠好的修繕，予阮會當看著新舊建築的融合。」

嘉義市文化局表示，這个所在過去是嘉義工業發展的重要場所，未來嘛希望會當成做市民關心公共事務，培養地方創生的新基地。