臺灣頭例 達悟族勇士對臺東划敆枋船到嘉義

佇故宮南院的至善湖划拼板舟，蘭嶼達悟族的張世凱，8月12對台東出發，用拼板舟環島，26下晡來到故宮南院。

黑潮勇士張世凱：「這擺的活動可能嘛是最後一擺，因為蘭嶼人嘛無一定會閣想欲出島踅台灣島。這是史上頭擺，是想欲予逐家知影蘭嶼拼板舟文化規个文化系統，閣有阮對海洋生態的保育。」

張世凱表示，這是in第一改用特有的拼板舟環島，選擇來到故宮南院，希望會當趁這改的機會紹介蘭嶼的文化。

黑潮勇士張世凱：「阮蘭嶼的船特殊的所在，伊是錐形的，佮台灣平底竹棑仔無仝。南島的舟形一般攏是錐形的，佇海面上划行。」

張世凱這位拼板舟的工藝師，嘛是嘉義的女婿，伊講當初佮看見台灣的導演齊柏林有約束，欲用拼板舟環島，紲落來伊按算31會划去屏東，完成20工的環島行動。