第32屆金曲獎 曹雅雯.許富凱奪"最佳臺語歌手"

第32屆金曲獎8/21熱鬧舉辦,最佳台語男女歌手,是由曹雅雯佮許富凱提著。已經入圍七改的許富凱今年總算成功著獎。抑若是曹雅雯這遍的作品佮傳統台語歌真無仝款,向望予逐家看著台語歌也會當有真濟變化。

等這个獎七年的許富凱,聽著家己著獎,表情歡喜閣激動。伊對歌唱比賽出道,翻唱陪伴伊大漢的台語老歌,唱出當初對音樂的初心,伊嘛講著其實有一段時間,是無願意接觸台語歌。

最佳台語男歌手 許富凱講,「因為自細漢唱台語歌彼時陣,同學唱的攏是流行華語歌曲,所以會感覺足自卑的,但是大漢了後唱台語歌比賽,有的人會講聽著你的歌,改變伊的人生,所以彼時陣我對台語歌的熱情閣揣轉來,」

過去因為環境對台語自卑,這陣佇音樂內底揣轉來熱情,許富凱也望未來各項藝術文化攏會當有台語,仝款想欲跳脫傳統台語歌的曹雅雯,這遍以創作專輯「自本」提著最佳台語女歌手參最佳台語專輯獎。

最佳台語女歌手 曹雅雯講,「自本的意思就是做家己,我私底下較捷聽Lo-Fi、chillwave、R&B、country,較算是獨立樂團的音樂,所以想欲共遮的音樂風格參台語結合,毋知影按怎,做看覓就著矣。」

同時也擔任製作人的曹雅雯,全程參與專輯製作,用新台灣歌的風格,唱出十年來的出道心情、人生故事,一路行來也特別感謝父母支持伊上北拚音樂,未來也會繼續用台語,唱出感動人的聲音。



 

全台敬老金大調查

相關新聞