林昀儒球技靠中國培訓? 教練:逐階段攏有功勞

小學時期的林昀儒佮啟蒙教練賴瑞雄做陣去釣蝦仔的相片，這當中有一个小故事。
 

林昀儒往過的教練──周東昱講：「伊發現一般練球攏真認真的昀儒，彼工煞有淡薄仔放放放，忝的感覺。伊就講佇釣蝦仔的時，才真正有看著伊彼个年紀愛有的笑容」。
 

話無濟、自我要求懸也是捌教過林昀儒桌球的周東昱，對伊上深的印象，因為佇東京奧運表現出擢，林昀儒的網路聲量衝懸，甚至有風聲講伊捌去中國拍球，受過中國教練指導，才有這種成績。對這種講法，周東昱認為，選手的培養，每一个階段攏有意義，袂當干焦看孤一部份。
 

周東昱表示：「每一个人攏有階段的任務參目標，所以阮算是一个團體的一份子，我感覺攏有功勞。但是我感覺上重要抑是啟蒙教練」。

台頂三分鐘，台跤規厝間，林昀儒對興趣拍到出名，每一个訓練過程攏是養分。毋過外界也好奇，為啥物台灣的選手著愛請中國教練來教。
 

屏東科大的講師──楊嘉恩講：「IN(中國)本底就有這種的素質的養成，所以講IN訓練出來的教練攏有一定的水準，因為IN已經是共IN當做是職業咧培養」。

楊家恩指出，中國因為環境、福利等等，培養出真濟有國際經驗的選手。林昀儒是照家己認為愛加強的部份，來選教練佮所在做訓練，也因為每一个歷程攏做甲真好才有好結果，呼籲外界應該注重選手的拍拚，予台灣的桌球實力通繼續提升。