嘉義縣推飼蜂 今年辦頭屆蜂蜜評鑑.捒在地品牌

拍開飼蜂的箱仔，檢查蜂蜜的情況，佇嘉義飼蜂超過四十冬的陳水通講，嘉義縣總算有蜂蜜的評鑑，會當予人知影在地的國產蜜。

嘉義縣農會總幹事 黃貞瑜:「各鄉鎮農會配合支持之下，咱所有的台灣鄉親，佇購買佮選擇蜂蜜閣較利便，會增加咱蜂農的收入。」

蜂農陳水通:「足濟人毋知影佗位會當買著好蜜，所以咱透過這个平台評鑑了後，逐家一寡消費者會較來揣咱。」

嘉義縣目前的蜂農有103戶，有登記的蜂箱仔有1800箱左右，而且有愈來愈濟的趨勢，為著鼓勵蜂農提升蜂蜜的生產，縣政府佮縣農會舉辦第一屆的蜂蜜評鑑。

嘉義縣鹿草養蜂產銷班柯明群:「阮縣政府這爿會當替阮按呢推廣阮好的龍眼蜜，這對我蜂農當然是幫助會誠大。」

蜂農鄧名賀表示，「今年的蜂蜜產量品質攏誠好，然後產量嘛有增加。」

縣農會表示，今年龍眼佮荔枝的花，因為無雨水，開了真好，嘛予蜂蜜的品質產量比過去閣較好，透過專業的評鑑佮未來的推廣，希望會鬥牽成飼蜂產業的發展。