工會投保就算勞工 藝文工作者請無藝文紓困

藝文紓困開始申請，但煞有藝文工作者反映，有真濟人因為投保佇職業工會，予勞保局自動列做勞工，欲申請文化部的紓困煞予人退件，希望相關單位會當解決這個問題。

聚光工作坊負責人李俊餘表示，「你講計程車伊攏會使領三萬塊，你講這寡餐飲業IN會當做外賣，阮是按怎做，攏無法度有收入來源。」

袂當演出無收入，藝文工作者、劇團演員當咧過寒冬，雖然政府才公佈藝文紓困補助，毋過有人向文化部請紓困煞予退件。

緣龍戲坊團長江明龍說，「大部份九十葩，阮的勞健保攏投佇工會較濟，攏佇工會所以予認定是勞工，咱市面上的阿姨仔，你欲叫IN閣申請審查，真正足困難。」

因為這馬的勞工個人紓困有三萬佮三萬，愛照資格審查，藝文紓困是直接發三萬，若已經投入創作經費，上懸通申請6萬，補貼較濟。但是勞動部佇進前發放自營工作者補助的時，就先用系統比對全台各職業工會，篩選出185萬人符合資格，其中包括保佇工會的藝文人士，毋過IN根本猶未申請勞工紓困、也無領著補助，這馬煞卡佇遮。

勞保局副局長蕭宗慶說，「阮因為數量真大，有185萬人，閣來是佮公路總局參觀光局等等，有一寡重疊的部份，可能愛對作業方面，無應該閣由當事人，佇各機關走傱，我想這个問題其實會當解決。」

對藝文工作者的陳情，文化部佮勞保局表示，若IN有身份予鎖牢的部份，會當閣向承辦單位申請審查，只要電話就會當完成，也會趕緊迒單位協調，解決程序上的問題。