郵局已經累計13例 工會望列第3類冗早注射

台灣郵政產業工會講,過去政府共伊叫做防疫國家隊,但是in這馬已經有13个同事確診,而且中華郵政對防疫無積極的作為,政府嘛無佇咧管,是感覺真生氣。工會要求,這馬上重要的是愛予郵政人員注著疫苗,人力、裝備佮防疫指引,嘛應該緊來補足。

出力共防疫國家隊的獎章摔咧塗跤,閣共首日封的感謝批裂掉,台灣郵政產業工會遐爾受氣,因為in認為,中華郵政對防疫無積極的作為。
 
台灣郵政產業工會副理事長黃柏維:「因為阮這馬已經有13个同事確診,是所有交通運輸業上懸的,阮局方對所謂確診了後一寡箍列做快篩等等提報,攏是相對保守的,為啥物,因為in驚影響人力。」

工會提出三个訴求,要求政府愛補足第一線的人員佮裝備;嘛愛建立普篩、隔離指引等等的防疫作為;上重要的是愛共郵政人員列入第三類的疫苗接種對象。黃柏維:「這馬予歸類做第七類對象,阮無論外勤內勤,攏需要捷佮民眾接觸,無法度避免遮的接觸風險,因此阮希望政府會使共阮的順位,調整做第三類對象。」
 
中華郵政副總經理兼發言人郭純陽:「所以阮嘛特別向主管機關交通部表達,希望會使爭取優先注疫苗,交通部嘛共中央表達阮的請求,其實嘛有好的消息,大概佇無久的未來,交通部就會共中央核配的疫苗撥予阮,這个部分閣咧等待上級機關的通知。」

工會講,過去政府講in是防疫國家隊,但是這陣煞共郵政同仁擲咧邊仔。工會呼籲,政府莫閣迴避問題,閣發一寡無用的物件,根本是咧食郵政人員的豆腐。

相關新聞

專題|全台敬老金大調查