疫情致屏東泰國蝦敗市 縣府籲中央專案補助

疫情衝擊各行各業，占全國產量八成的屏東泰國蝦嘛敗市，漁民個外月以來，攏無出貨，萬外斤的泰國蝦，一直飼佇塭仔、毋敢掠，漁民希望政府協助揣通路，屏東縣農業處表示:會想辦法鬥銷，嘛已經建議中央，專案的補助辦法。

漁民拋網掠起來的泰國蝦，大部份攏已經會當出貨矣，煞拄著疫情嚴重，全國餐廳、釣蝦仔場停業，遮的泰國蝦賣袂出去，只好一直飼佇塭仔內。
  因為泰國蝦愈飼愈大隻，成本就愈懸，漁民家己想辦法，干焦會當透過網路、菜市仔抑是賣親情朋友，銷出去的量無夠一成，屏東泰國蝦產量占全國八成，全屏東四千外个塭仔，一年產量六千噸，這站仔敗市，漁民煩惱疫情若無轉和，蝦仔就全報銷，in希望政府鬥相共建立平台。
  農業處表示，舊年就協助業者改用冷凍加工，這馬嘛咧揣通路，希望民眾鬥相共支持，另外嘛已經建議中央，除了漁民生活補助以外，對泰國蝦產業專案紓困佮補助。