囡仔學柔道煞摔到腦死 民團:政府著擔監督責任

頂日仔發生佇臺中有一個7歲的囡仔咧柔道課時，去予教練和學長摔甲重傷。民間團體今仔日召開記者會表示，全臺灣有1900外个基本訓練中心佮3000外个教練，in的背景、訓練囡仔的過程，和機構敢有安全、敢合法，政府愛緊監督，避免意外閣發生。


4月21 台中一个7歲姓黃的查晡囡仔去道館練柔道，予教練佮學長連摔27擺，這陣腦壓袂降到正常值，猶蹛院治療。人本教育基金會佇30，國際無拍囡仔日這工開記者會，認為台中市柔道委員會無把關就予無教練證的何教練教囡仔，台中市政府運動局無監督，攏有責任。

民間團體認為負責監督國民體育法的主管單位體育署，也愛負責任，包括發教練執照的辦法、處理無適任教練的機制，各級體育委員會層級體系責任歸屬，也愛訂清楚。

另外2位予何教練指示去共人摔的小學學長，人本教育基金會表示in因為毋敢違背教練，心內自責、也有創傷，29基金會也向監察院提出陳情書，望全台灣1900外个基本訓練站，3千外位教練的資格、教育和訓練囡仔機構的安全性，攏愛過點、訪視，避免遺憾閣發生。