新北十四張欲徵地 居民不滿開發規劃.要求退回

新北市新店十四張這搭的居民,今仔日和文史工作者來到內政部營建署門口開記者會,指控新北市政府佇遮進行的開發計畫,攏無參考在地居民的生活習慣佮歷史背景,要求內政部愛退回。新北市政府也回應講,會參考意見。

新北市新店區十四張的區段徵收開發案當咧進行。3月18,十四張在地居民佮文史工作者佇內政部營建署頭前開記者會,in講新北市政府的開發計畫攏無按照當地居民的生活習慣、佮歷史背景,要求內政部愛退回新北市政府的開發計畫,嘛愛新北市政府愛佮居民對話,才來重新規劃。

按照新北市政府這馬的規劃,捷運環狀線南機場以北青色的部份,按算是公園用地;南機場以南藍色的部份,欲來當作住宅佮商業使用,受影響的地主上少有400人以上,毋過因為這內底大部份攏是農地,所以只有差不多十戶徛家。

毋但是公園設置的地點有問題,新店區中山里里長表示,新北市政府的規劃,會予在地的古厝門樓、老樹、墓地等等攏消失、抑是需要徙位。比並(phīng)起一座僫得(oh-tit)到的大公園,若是共原本需要徙位的古厝四箍圍仔變做小公園,應該是較好的方案。

新北市城鄉發展局是表示,設一个無佇咧住宅區的大公園,是因為公園地下按算欲做汙水處理廠;針對共古厝邊仔變做公園的提案,是會使納入評估。

新北市政府表示,過去有辦過說明會佮公開展覽,彼時陣來參加的地主是無啥物反對的意見,是到較尾後才有文史工作者佮居民提出異議。這馬有欲針對樹欉保存的問題來改變計畫,古厝門樓是計畫欲徙去公園去,座談會的部份,目前是無計畫欲閣開。

全台敬老金大調查

相關新聞