阿里山管理處串聯地方產業 促進嘉義旅遊商機

交通部觀光局阿里山管理處，為欲推廣阿里山的主題旅遊，整合嘉義地區的產業，配合村里長佮在地發展協會，推出旅遊的方案，希望替這陣國內旅遊，創造閣較濟的競爭力。

三月初十阿里山的櫻花季得欲正式開始，為著欲吸引民眾來阿里山，交通部觀光局阿里山國家風景管理處，結合在地咖啡、茶米業者，配合旅行社佮飯店，希望佇目前較無法度出國的這段時間，增加民眾來阿里山旅遊的意願。

針對阿管處欲增加阿里山旅遊的作法，在地的社區協會佮產業，攏表示真認同，毋過嘛有人認為，目前當著時的國內旅遊，總有一工會閣平靜落來，嘛著愛思考未來的規劃。

旅行社業者表示，阿里山櫻花季了後，紲落來閣有親像火金蛄這種的特色活動，嘛是希望相關單位會當整合觀光的資源佮在地產業，替阿里山的區域觀光，建立會當互相協助的觀光產業鏈。