逍遙園無建築圖僫修復 全靠相片.3日本師傅

高雄市的歷史建築逍遙園修復之後，11月份開放參觀。這棟80年歷史建築是日本式的農園別莊，因為拋荒誠久矣，欲恢復往過的模樣誠無簡單，因為揣無設計圖，攏是靠古早的相片，才修復好勢。


踏入逍遙園的二樓，就感受著這棟別莊的雅緻，天篷、柱仔、壁堵，每一个所在攏有故事。

逍遙園內部的建築、妝娗，毋但充滿日本風格，嘛融合西洋元素，來到這个灶跤，煞出現現代的灶台仔。

這間日本貴族大谷光瑞的別莊，這馬完全修復，看著遮爾媠的別莊，整修過程其實真濟困難，一開始完全揣無建築圖等等第一手資料，後來是靠日本人提供光批佮相片才知影伊生做啥物樣。

大谷光瑞佇1940年起這間豪華別莊，二戰了後是病院宿舍佮眷村，看起來破破舊舊，險險就予人拆除，佳哉文化局佮民間合作修復，甚至專工揣日本師傅來台灣幫贊。

這擺逍遙園重新開放，文化局對日本借來，80冬前逍遙園成立時的紀念瓷仔盤，來台灣展出一個月，民眾會當斟酌參觀這間見證高雄發展的歷史建築。