李恆德將近80歲教臺語 期待臺語繼續傳承

這幾天臺語意識一直興起來，也越來越多人重視臺語，就有一位咧欲80歲的李恆德老師，投入臺語教學已經6冬外，希望臺語文化，會當生根發葉。

頭毛喙鬚白的李恆德老師，佇臺頂教學生按怎唸臺語的入聲。

李老師講寫臺文會使激頭殼，順紲檢視家己的臺語程度，也通成做學生的好模範。食到七八十歲，投入臺語教學，也予對香港來的就締學堂執行長真佩服，甚至為著真少人學的臺語開班。

執行長呵咾李老師人熱心、教冊閣認真，真濟對臺語文有趣味，抑是想欲共母語抾轉來的民眾，攏相爭走來綴伊學臺語。

若有心欲學臺語的學生，李老師攏真歡迎，而且閣會針對in的需求來設計教材。

李老師表示，真濟學生是因為做工課愛講臺語才會來學，毋過，也有人認為這陣講臺語當時行，會曉講較占贏。毋管in學臺語的動機是啥，未來伊攏會繼續教，向望咱的母語代代湠。