農民進口無菌培養土種作 網仔瓜媠.肉閣甜

今拄好是網仔瓜大出的季節，彰化埔鹽有一位專門種網仔瓜的農民，特別對國外引進一種無菌的培養土，用來種特殊品種的網仔瓜；種出來的網仔瓜肉質幼、飽水又閣甜，有影受眾人的呵咾。

飽水的網仔瓜，咬一喙甜閣脆，連民眾攏用大頭拇比讚。

彰化埔鹽鄉的果子農陳國鎮，為著欲種出品質好閣甜的網仔瓜，14冬來下真濟苦心，連種網仔瓜的塗攏是對國外進口。

為著顧品質，陳國鎮的果子樹一欉干焦留一粒果子，而且伊閣特別栽兩種品種無仝的網仔瓜，提供予消費者選擇。

好食的網仔瓜，予人一喙紲一喙食袂煞，連在地的鄉長嘛呵咾甲。

咱臺灣種的果子，品質通人呵咾，這陣網仔瓜大出當著時，熱天食落到地，實在予人心涼脾肚開。