社區辦課程.教園藝 序大相招.歡喜種蔥

佇彰化和美的源埤社區，因為往過攏是做田人，所致遮的關懷據點，也開始教阿公阿媽種蔥。想袂到蔥仔種佇花坩內真古錐，心適又閣趣味。

斟酌說明種蔥仔的撇步，彰化和美鎮源埤社區的老師，教序大對剪保麗瓶、囥土、布蔥仔栽，一步一步，用長輩煮飯、炒菜攏用會著的蔥仔，做園藝課程的主角，阿公阿嬤展出家己種的作品，笑甲喙啊裂獅獅。

和美鎮源埤社區關懷據點不時就有活動，學做餅、做花燈、跳舞，課程豐富，長輩真愛來遮，平均攏有18个序大會來，平均歲數超過80歲，這擺社區特別舉辦種蔥仔栽的活動，就是希望連結往過長輩種作的經驗，予逐家佇創作的過程，加一寡刺激和話題。

綴這陣時行的室內植物園藝，社區據點以遮老一輩的生活經驗為出發點，設計課程，這陣長輩講想著這陣有蔥仔伴，in加真較濟動力來遮。