隱形目鏡水盒仔材料結構單純 通回收再利用

這就會當掛出來
是一个目鏡你敢欲掛看覓

這支色水真媠、閣有造型的塑膠目鏡，佇10分鐘進前，只是一寡塑膠糞埽。環保業者提幾个隱形眼鏡的盒仔、飲料蓋，閣加一寡咖啡粉，

我共這爿材料輕輕的齊勻的倒佇阮的熱枋頂懸，高溫共塑膠變軟、軟甲親像麥芽膏仝款。，完全共伊囥入去，足像做雞卵糕仝款，然後紲落去，兩支手對下跤硩

然後提入去機器塑形，這支循環再生的目鏡框、就完成矣。業者講隱形眼鏡的水盒仔，屬於聚丙烯材質，這款材質耐高溫、結構單純有真懸的回收價值。

垃圾廚坊活動營運經理 邱盈翔
（隱形)目鏡的水盒仔阮會當有真濟運用，像包括阮垃圾廚坊的產品，大部分攏是用5號聚丙烯，水盒仔嘛是一个真讚的原料，因為伊會當做透明的款，所以伊會當做 做充電盤的外殼，目鏡框的外殼 閣有就是碗的容器材料

臺灣有真濟人掛隱形目鏡，煞真少人知影塑膠水盒仔會當回收，這馬有真濟目鏡行、為著響應環保，閣提出環保金，鼓勵民眾共塑膠水盒仔提轉去門市回收。

連鎖眼鏡行經理 康景堯
阮大概是對舊年就是，2024年9月就開始做回收動作，這馬嘛一年外矣，目前累積的量有1560公斤左右，然後已經突破1000外人次的回收量

全世界逐冬產生大量的塑膠，毋過回收再利用的比例無到一成，親像糞埽廚房積極佇社群分享，舉辦展覽手工，就是希望透過美感、喚起社會關注。延續塑膠糞埽的性命和價值。

記者 鄭亞宣 林郁凱臺北報導