基隆欲編預算、人力 過年前成立台語委員會

基隆市文觀局長 江亭玫(2025.11.19)：「台語委員會內的規章制度當咧訂。」

基隆市議員 張顥瀚 vs. 基隆市長 謝國樑(2025.11.19)：「（會當共咱報告一下，咱這馬規个進度會使無？）按呢我建議是按呢，咱佇舊曆過年前麻煩你共成立予好，開頭一改的大會（討論工作）。」

11/19佇基隆市議會咧總質詢的時，針對「台語委員會」敢會設立的問題，市府表示tsín已經咧訂規章制度，市長謝國樑嘛答應編預算、人力來做，拍算舊曆過年前欲成立、屬佇文觀局下底，未來通辦台語活動。提案的議員張顥瀚表示，伊希望這个委員會，通對台語家庭和復振的政策落實有幫助。

基隆市議員 張顥瀚：「咱紲落來嘛是希望講邀請一寡，民間的團體，毋管是台語路抑是足濟咱的民間團體，做伙來逐家想看覓講，這是全臺灣頭一个委員會，咱透過遮的部份會當推動閣較濟政策的一寡方向。」

台語政策推動聯盟自10月底發起「台語復振委員會」連署，呼籲中央和地方應當做陣拍拚，頂禮拜四高雄市長陳其邁已經拍頭陣參與中央的連署，今地方的部份、基隆已經拚出成果。毋過民團呼籲相關的台語委員會莫干焦是為著辦活動才做，嘛建議各縣市也通照國家語言發展法，來推動台語成做地方通行語，起造台語環境。

台語政策推動聯盟召集人 許慧盈：「怹除了講有台語復振委員會以外，怹嘛會使根據國家語言發展法內面的規定，就是講縣市政府伊嘛會使透過怹的這个民意單位，若通過了後，會當用怹彼个所在上濟人使用的語言，來做怹這个地方的這个通行語。」

民團表示目前已經有231个團體和公司、佮3千外个民眾參與連署，嘛希望設立台語復振委員會的層級愛會當迒部會溝通，莫干焦限制佇文化教育單位下底，按呢台語環境的推動才有通全面。

記者 呂尚儒 王志剛 基隆報導