彰化業者普渡拜拜攢豆皮蓮花 製作過程厚工

佇菜市仔內底的素料店，有大麵、麵筍、濟濟豆仔做的物件，但是詳細看，這豆皮的形體誠特別，是一蕊蓮花，閣有豬跤佮佛手造型的豆皮，是店家佇過年拜觀音或者是舊曆七月、普渡月的時陣，才有攢的物件。

民眾：「（你哪會知影遮有咧賣豆皮蓮花？）蹛遮的攏知影。（你專工來買？）著，我定定來遮買（物件）。」

民眾：「普渡拜拜，會當攢素食的。我毋捌看過（豆皮蓮花），頭一改看，感覺誠特別。」

店頭表示，做一蕊豆皮蓮花，愛先拗豆皮、鉸花瓣，等焦燥定型，閣落油鼎糋過，花蕊才會展開，上無愛兩工的時間才會當完成，怹是對日本時代開業，就一直傳到今。

業者 陳映彤：「這就是以前的人，無物件通食，攏會想講，用豆皮落去做花、落去做豬跤、落去做無仝款的物件，因為這是咱的心意，用怹有的物件去變物件出來。這幾年來愈來愈少（豆皮蓮花），因為大部份逐家攏叫廟的攢（普渡）。」

文史工作者 顏震宇：「較早先人來到遮的時陣，有帶來一个信仰，咱一般叫做菜堂，主要叫齋教。怹咧拜拜的時陣因為怹家己無食臊的，所以就委託遮的做豆仔廠商，來共（豆皮）做三牲的型，抑是講拜拜（供品）的型。」

文史工作者指出，過去彰化的菜堂信仰真興，也帶動食素食的發展，演變出濟濟豆仔類的食物，抑若這陣因為逐家普渡的習慣改變，加上做豆皮蓮花真厚工，目前已經真罕咧看著，店頭家就表示，怹會堅持製作，就是希望會當保留這門工夫，嘛欲傳承在地的普渡風俗佮食食文化。

記者 楊舒晴 彰化報導