市集結合唸歌表演 予囡仔學台語、了解宜蘭腔

「一粒柑仔、兩粒柑仔，愛按呢提起來按呢，三粒柑仔，按呢你就挑戰成功矣，欲試看覓無？」

擲沙包，用台語算水果的數量，宜蘭縣文化局拜六，佇化龍一村舉辦台語市集，除了有關卡通耍，也有藝術表演，就算落雨天，猶是袂少家長𤆬囡仔來耍。

民眾蔡小姐：「阮本身就講台語，阮有排擔，阮有來遮排擔，阮是宜蘭的台語共學，所以平常時攏是有講台語的故事，予囡仔聽。」
囡仔邱小弟：「好耍啊。」
「按呢你平常時敢會講台語？」
「會啊，佮阿公阿媽講。」

「小弟仔幫忙撆手捥，大兄暗轉食凊飯。」

手彈月琴、喙唸歌，伊是遇禔唸歌傳唱藝術團的團長－－吳栯禔，臺灣各地的台語有腔口差，吳栯禔希望透過唸歌，毋但傳承唸歌藝術、也傳承宜蘭腔予後一代。

遇禔唸歌傳唱藝術團團長吳栯禔：「阮宜蘭有一个腔口，叫做，就是宜蘭腔，酸酸軟軟，食飯配滷卵，咱的台語漸漸欲失落矣，我一直感覺講，咱會當用唸歌來講台語，來教囡仔，甚至用歌謠。」
宜蘭縣文化局文學及圖書資訊科科長陳怡華：「宜蘭腔其實是代表咱宜蘭縣真重要的語言，所以阮是想講這馬時代咧變化，佮阿公阿媽可能攏有一段落差，所以阮希望透過這个計畫，會使共這个台語保留落來。」

這个市集，是宜蘭縣政府配合文化部「培育台語家庭計畫」，推出的活動，通予台語家庭收集點數，文化局表示，紲落來到年尾進前，有百外場的活動，親像意識培力課程、表演、講故事活動，予任何對台語有興趣的家庭攏通參與。