新竹辦菜市仔台語導覽 予親子體驗喝花文化

鼻著香菇味囡仔攏喝芳，佇臺灣的傳統市場內，上捷聽著的語言就是台語，看著老師專工𤆬逐家來到遮學台語，頭家娘講用台語無論是開講抑是買賣，就是有一種親切的感覺。

市場商家：「我感覺這馬的囡仔，袂曉講台語的較濟，這馬教𪜶這个方式，傳統古早的(台語)真正足讚的，台語較親切，敢若講，因為我是下港人，講(台語)的感情無啥相𫝛。」

經過頭家的介紹，猶閣有台語老師專業的導覽，民眾除了會當學著一寡日常生活中的台語用詞以外，嘛體驗著傳統市場滿滿的人情味。

民眾：「對這馬的囡仔來講，其實𪜶嘛對菜市仔足生份的，因為這馬大部份，攏是去超級市場買物件，菜市仔遮內底較有人情味。」
民眾：「（來菜市仔若講台語 應該較有人情味)，有啊，當然啊，因為細漢的時陣攏講台語較濟。」
台語老師蔡秋芬：「予囡仔會當講台語，傳統市場是一个較好的所在，而且囡仔其實𪜶這馬的足罕得踅市仔，所以無的確𪜶連傳統市場內底的物件，攏無真正看過，所以𪜶會當來遮，𪜶會當體驗會當看，會當實際去看著彼个物件、鼻著彼个物件，譬論講澹澹的塗跤、抑是臭臭的味、芳芳的味、酸酸的味，我攏感覺這是足好的體驗。」

現場閣安排趣味的覕相揣活動，透過手中的圖片，去走揣出傳統市場內的特色店家，予逐家咧提升台語能力的時陣，嘛會當深入了解地方文化特色。