高雄鳳芸宮媽祖海巡4/9啟航 跋桮選5隻公船

由鳳芸宮主委代表跋桮，為這科的巡香活動，來選出護送媽祖、水仙尊王佮三位千歲的5隻公船。鳳芸宮四年一科的海上巡香，將欲佇4月初九起鼓，予選作公船的漁民講，就算所有的開銷攏愛家己自費，就算這段時間攏無法度出海掠魚，只要會當為媽祖服務，in攏歡喜甘願。

船長黃至慶講：「袂講有啥物缺憾之類，後壁媽祖佮王爺嘛會共阮鬥保庇、鬥趁轉來，所以講這對阮來講無啥差別啦。」

高雄歷史博物館長李文環講：「按呢的儀式其實是源自討海人佇古早時代，伊對海上作業的兩種煞心，一个是煞心平安，一个是煞心豐收。」

上早會當追溯到清朝的媽祖海巡活動，主要任務是欲掃除海域上無好的物件，保庇漁船出海平安、大豐收，予選作公船的船仔，等於是佇咧執行公務，這擺的跋桮結果也真趣味，中選的船仔大部分攏是10噸以下小隻船仔，廟方講，這是媽祖慈悲。

鳳芸宮總幹事王清旭講：「阮選著的差不多攏坐細隻仔，大隻船仔攏總欲讓出來予人客坐，這相信嘛是媽祖伊足厲害的所在矣。（記者問：細隻是偌細隻？）彼細隻差不多一頂轎，有當時閣ﰕ袂落去，攏愛閣懸空起來，閣吊著按呢才有法度囥會落，若無囥袂落去矣。」

鳳芸宮表示，今年有20外隻船參加海巡，海巡路線對林園出發去臺南安平會香。綴媽祖會香的所有漁船，攏會用燈火、花蕊來妝娗，回程彼工，媽祖也會駐駕高雄港，到時民眾會當作伙來感受，這個全國規模上大的媽祖海巡文化。