台語家庭僫經營 板橋台語共學團交流經驗

大人囡仔唱歌：「我佇遮真歡喜，我佇遐嘛歡喜，我佇任何所在攏嘛真歡喜，歡喜。」

大人佇台頂，𤆬囡仔鬥陣唱台語囡仔歌。
 

「來，線這，猶閣有彼个黏布。」

現場也用台語，𤆬囡仔共紙拗做紙砲，這是母語團體舉辦的共學活動，現場有濟濟台語家庭的大人囡仔參與，用台語交流，真濟人攏感覺真心適。

台語家庭家長李先生：「就想講自細漢就有台語的環境，嘛揣一寡囡仔姊、囡仔兄，會當做囡仔伴。」
台語家庭家長游小姐：「阮細漢就是攏講台語，佮阿公阿媽嘛攏講台語，就是足四常，毋過囡仔一離開厝裡，去外口，就攏接觸攏華語的世界矣。」

一寡家長有心欲經營一个台語家庭，但是定拄著困難，親像毋知濟濟華語詞的台語通按怎講、抑是按怎面對親情朋友對台語家庭的質疑。母語團體希望透過共學團，毋但予台語家庭的囡仔有交台語朋友的機會，家長之間也通互相交流。

共學團發起人/台語路podcast台長阿蓉：「伊若是想欲對囡仔講台語，抑毋過囡仔可能較細漢、抑是較大漢、抑是已經傷大漢矣，伊煩惱講囡仔會毋願接受的時陣，會使按怎來做。」

這个共學團對2020年成立，對一開始只有零星幾个台語家庭，到今經過5年，已經有20~30組家庭，捷來參加台語共學團聚會。發起人之一阿蓉希望，透過這个共學團，通予台語家庭的家長，有機會分享經營台語家庭的經驗，予台語家庭的團體閣較活潑發展。