《姓名條例》三讀通過 原民名姓通寫入身分證
發布時間：
更新時間：
今年5月，立法院三讀通過《名姓條例》修正，原住民族會當佇身份證的名姓彼欄，寫族語的名，無一定愛寫華文字。針對這項修法，今仔日（21）內政部公佈《名姓條例施行細則》草案，訂出詳細的改名指引。有台語文學者呼籲政府，嘛愛開放身份證頂頭寫台文羅馬字，尊重所有用母語號的名。（新聞標題、導言及內文皆為臺語文）
世界12強棒球賽當咧熱，原住民團體特別貼文，用日本話紹介台灣球員──Giljegiljaw Kungkuan名姓按怎唸。今年5月立法院通過《姓名條例》修正，允准原住民族身份證用原住民文字寫名姓，也通免寫中文。拜四內政部公佈《姓名條例施行細則》草案，予民眾佮戶政機關有依據。
內政部簡任視察 郭凱迪：「由原住民族委員會，調查確認傳統名姓文化慣勢風俗，閣再由內政部會同原民會，訂定指引，所以佇施行細則增訂原住民族，應該以指引，使用傳統名姓。」
雖然2019年開始，《國家語言發展法》予民眾申請護照，會當佇外文名姓欄位寫台文羅馬字，但是這擺《姓名條例》修正，只有開放使用原住民族文字，抑無就愛用中文。學者呼籲增加欄位，予中文名姓、台文羅馬字名姓，做伙寫佇身份證頂頭。
成功大學臺文系教授 蔣為文：「其實你就算咱一般臺灣人咧講台語、抑是講客語，抑是講其他無仝的語言，嘛是有這个需要。你上無我感覺你閣加一欄，加一段羅馬字。」
內政部戶政司司長 陳永智：「台語拼音毋是姓名條例規定使用的文字，需要由國家發展語言法（國家語言發展法），閣有伊的施行細則所規定的相關機關、權責機關共同研商。」
內政部表示，身份證加寫台文名姓，牽涉書寫系統、名姓登記系統等等因素，需要由《國家語言發展法》主管的相關機關修法；若未來法條通過，內政部就會執行。
記者 郭柏均 林郁凱 台北報導
唐嘉良/編輯
