產業結合藝術 新竹南港里民用蚵仔殼佈置社區

新竹南港里因為倚海，過去蹛佇遮的民眾攏靠飼蚵仔食穿。社區發展協會想步、招老師共欲擲掉的蚵仔殼，提來做藝術創作，透過活動、嘛予里民對社區閣較有感情


透過序大逐家的合作，共蚵仔殼沓沓仔黏佇社區的壁頂，一幅蚵仔殼的大型美術創造就漸漸完成矣，閣有阿公阿媽專工☒孫來體驗，那做那開講實在真趣味。

當地里民連秀金表示，「來遮逐家鬥陣來畫圖，做遮的代誌，那畫那開講、感覺足趣味。」
當地里民曹美鳳表示，「蚵仔殼提轉來就是倒佇後壁空地，然後落大雨時，就拄好共(蚵仔殼)的臭羶味攏沖掉。」
社區大學老師李宜瑾講：「南港的風情、南港的歷史故事，阮就用畫圖，來共咱南港的故事畫出來。」

在地耆老講南港社區因為倚海邊，早期蹛佇遮的人、大部分攏是飼蚵仔賺食tsuán-tsia̍h，所以逐家攏共遮叫做"蚵寮"。

地方耆老林印表示，「彼陣阮規庄攏嘛咧破蚵，遮無啥田、無啥穡頭通做，逐家攏是為海咧生活，攏插蚵仔生活較濟，所以逐家才叫(遮)蚵寮。」

社區發展協會指出，會用蚵仔殼來創作，除了希望予後代囝孫知影，當地過去的發展歷史，嘛鼓勵序大行出來外口參與社區活動。

南港社區發展協會總幹事羅玲珍：「利用蚵仔殼來做裝置藝術，予咱後代囝孫知影講，以早阿公阿媽咧做啥，這是啥物物件，其實這物件(蚵仔)毋但破開了會使食，這蚵仔殼嘛是足好用的，足有利用的價值。」

平常時社區嘛會安排趣味的課程，予序大鬥陣來體驗，透過逐家的創作嘛予社區是愈來愈媠。