社頭湳底村老化嚴重、醫療欠缺 病院巡迴看診
發布時間：
更新時間：
彰化社頭的湳底村，大約有兩千人，65歲以上的序大佔18.6%，人口老化嚴重，但是庄頭內面無診所、藥局，若欲看醫生就愛去市區，路途遙遠、對序大來講真無方便，這陣有病院向衛福部申請巡迴醫療服務，逐禮拜四會來社區，替居民看病，希望改善偏鄉醫療資源欠缺的問題。（新聞標題、導言及內文皆為臺語文）
彰化社頭的湳底村，大約有兩千人，65歲以上的序大佔18.6%，人口老化嚴重，但是庄頭內面無診所、藥局，若欲看醫生就愛去市區，路途遙遠、對序大來講真無方便，這陣有病院向衛福部申請巡迴醫療服務，逐禮拜四會來社區，替居民看病，希望改善偏鄉醫療資源欠缺的問題。
彰化社頭的湳底村，人口大約兩千人，65歲以上的序大佔18.6%，但是庄內無醫生館嘛無藥局，社區的序大若破病，就愛去到市區看醫生，交通真無利便
社區序大表示，「看醫生愛去到員林、無就社頭，踏鐵馬踏甲足艱苦的、足忝的。」
閣有社區序大嘛講，「老歲仔有的就敗跤頭啦，無就遐疼遐疼啦，嘛是愛揣醫生啦，無揣醫生袂好啦。」
湳底社區表示，庄內的少年輩大部份攏出外去食頭路，序大若欲去市區看病，就愛坐公車，路途遙遠，這陣有病院向衛福部申請改善計畫，逐禮拜四會來社區替居民看病
湳底社區總幹事劉景琨表示，「阮遮的序大若袂曉騎oo-tóo-bái，若無厝內的人載，阮攏愛去員林客運的車牌仔跤，等一點鐘一幫的車，坐去員林了後才閣行路去診所，基本上阮遮的序大看病，真正是無方便。」
常春病院醫生汪國馬嘛提醒，「譬如講三高的病人，可能三個月才去病院一擺，若來湳底村的社區門診，針對慢性病可能會當有較好的控制。」
醫療團隊指出，臺灣已經是高齡化社會，序大普遍較會有高血糖、高血壓、慢性病遮的問題，透過社區巡迴醫療服務，通好隨時掌握序大的身體狀況，嘛希望會當改善偏鄉醫療資源欠缺的問題。
記者楊舒晴 彰化報導
吳思薇/編輯
