母語家庭生活節 𤆬囡仔耍遊戲歡喜學台語文

民眾VS工作人員：「出門一蕊花，入門一條瓜，啥物物件是按呢？」「緊咧是啥？」「雨傘」「足𠢕的」

學台語的孽譎仔話，這是母語團體主辦的母語家庭生活節，今年的生活節以「Log in台語島」做主題，用若像咧耍電動、過關卡的方式學台語文，囡仔也耍的真心適。

台語路協會理事長董力玄講：「囡仔其實你只要提供伊語言的環境，伊足自然就學會曉，上重要的環境就是佇咧厝內，所以爸母對囡仔講是第一要緊，毋但是佇咧厝內愛講台語，阮規个社會嘛愛來共同支持
遮的台語囡仔、母語囡仔。」
李江却台語文教基金會執行長陳豐惠講：「希望這个台語島會當久久長長，而且毋是孤島，會當一島、一島、一島，按呢共伊連起來，到尾規个台灣，會當是一个真大的台語島。」

生活節透過市仔、課程、講座多元元素，營造自然講台語的環境，鼓勵大人囡仔共母語抾轉來。母語團體也發現，最近愈來愈濟家長意識著母語的重要性。

家長李小姐講：「若是囡仔攏袂曉講，後擺真正無人會曉講台語矣。」
家長龔小姐講：「台語嘛是家己的語言，嘛是愛共伊學起來較好，予𪜶知影，會曉聽、會曉講。」

母語團體講，𪜶的台語共學團有差不多200个母語家庭成員，真濟家長會開始參囡仔講台語，是因為對台語有感情；但是𪜶發現，最近愈來愈濟家長意識著，台語參文化、歷史真搭密，因為這寡原因開始講台語，實行母語家庭。