慶祝結婚半世紀 高雄辦桌請300對序大人

民眾盧傳家講：「（結婚）75冬，我已經97歲 ，（太太）95歲矣。」

民眾林自巷講：「結婚72年矣。」

輕輕仔共太太的手牽起來，in攏是結婚超過70年的翁仔某，來參加今年高雄市社會局舉辦的銀髮婚姻紀念活動，問in按怎予婚姻行甲久久長長，in答案攏仝款。

民眾盧傳家講：「互相忍耐，怨天怨地無效啦，食好食䆀無怨慼。」

民眾林自巷講：「台語有一句話，無冤家不成夫妻，但是逐家愛互相諒解，若冤家著愛如何想講較緊和好。」

高雄市社會局佇重陽節進前，邀請300對結婚超過50年的翁仔某，做伙來飯店翕相閣食喜餅鬥鬧熱，社會局表示自本開放110對的來報名，想袂到有300對攏來報名，其中59對翁仔某暝日對看超過一甲子，序小看著攏誠欣羨。

親友楊先生講：「我佮阮某嘛是20年，我感覺20年真無簡單，50年是愈無簡單，我感覺婚姻會當按呢維持，真正是阮愛好好仔學習。」

人佇咧講翁某恩愛人呵咾，互相尊重無煩惱。遮的序大建議夫妻愛互相尊重、莫互相棄嫌，按呢翁某才通牽手一世人。