雲林北港"五湖四海宴"工藝展 9/14正式起鼓
發布時間：
更新時間：
一年一改，中秋彼跤兜舉辦的雲林北港「五湖四海宴」工藝展，14早起共朝天宮的傳藝媽祖，請去南陽國小的會場，活動正式開幕。邀請全國各地108个工藝師，用作品代替辦桌的好料，獻藝予媽祖，嘛互相交流技術。五湖四海宴已經辦第十一冬，已經是臺灣工藝保存佮傳承，重要的一个平臺。(這條新聞標題、前言是台文)
對北港朝天宮出發，欲來共傳藝媽，請來五湖四海宴的會場。14早時，雲林北港舉辦一年一度的五湖四海宴工藝展，108位工藝師，欲用IN的作品，來敬獻予媽祖。
雲林縣傳統工藝文創產業發展協會總幹事 蔡享潤：「今年拄仔好是阮朝天宮，330冬的建廟紀念，所以阮嘛是特別用這个方式，拄好閣龍年 真濟老師做龍的(作品)來展覽。」
木雕、剪黏、彩繪、捏麵尪仔等等各種無仝的作品，計共108件。工藝師佮民眾攏會當誠近來欣賞遮的作品。臺灣工藝聯盟表示，透過五湖四海工藝展這个平臺，工藝師之間的交流，對傳統工藝的傳承，有誠大的幫助。
臺灣工藝聯盟總會長 陳啟村：「會當予真濟工藝家，會當互相去看著ﰀ真好的作品，嘛會當佇這內底互相鼓勵 互相成長，這對臺灣工藝的發展 是相當重要，
現場民眾 陳小姐：「這攏是愈來愈罕見的物件，足罕得看見的，予一寡後代囡仔會當較捷接觸。」
今年已經辦第11冬的五湖四海宴，對9月14開始，欲展覽到9月17，展覽的活動當中，配合工藝師閣有舉辦一寡體驗課程，希望透過活動的舉辦，予傳統的工藝文化，會當用多樣化的方式，繼續來傳承。
邱丹霓/編輯
