休士頓台灣語文學校 搬請成大教授開台語課

老師佇頭前教囡仔弄獅，看起來真心適，這是佇美國的休士頓台灣語文學校，自1985年成立到今已經欲40冬，為著欲予佇美國生活的臺灣人、臺美人，通有接觸臺灣文化、語言等等的環境，嘛有開真多元的課程。8/24學校專工邀請成大臺文系的老師、和臺灣羅馬字協會，去開台語羅馬字的研習課。

休士頓台灣語言與文化學校校長 Kevin Wang：「為著欲有法度，顧著阮固定教的學生囡仔，有法度知影講，伊遮的字按怎寫，伊以後看著伊的筆記看冊，伊會當唸會出來，閣無需要特別去學漢字，阮就開始爭取開始安排，看欲按怎來辦這个研習營，予咱的休士頓的鄉親，會當進一步了解咱台語的語言。」

校長嘛表示往過學校的台語教材，攏愛老師家己編，毋過這幾年臺灣的台語教材愈來愈多元，多數攏有發音通聽，對怹來講學生欲學台語嘛那來那方便，怹也真歡喜看著這款的改變。抑若這改受邀請去休士頓的蔣為文教授表示，研習課除了教白話字按怎讀寫、嘛會講著文學史。另外，因為研習課干焦一工，怹嘛會共線頂的台語教材，介紹予休士頓台灣語文學校的師生知影。

成功大學臺文系教授蔣為文表示，「就是講先予in有基本的概念，閣來因為咱嘛有教材，咱教材嘛有開放，有線頂的教材，嘛有書面的教材，in會當搭配教材，轉去厝裡了閣做一寡複習。」

另外，蔣為文嘛表示，這改的學員凡勢有一寡是有興趣欲做台語老師的，怹嘛希望透過這改機會，共海外台語師資的種子墊落去，後續嘛有按算欲開線頂課程，予台語的未來愈來愈大葩尾。