學生捷予猴搶食物 中山大學試辦補償100箍

中山大學的學生，對超商行出來，是隨共麭藏佇衫內面，就驚講會有猴山仔來搶，遮是學校統計，猴山仔上gâu搶物件的所在，除了校內的超商，第二名就是停車場。學校對半冬前開始試辦猴山仔搶食補償金的政策，到今有17位已經請著，領著上懸有一百箍的補償金，學校表示講，自二月試辦到今，逐個月平均有三件。

中山大學學生，「(物件)儘量囥佇就是面頭前，莫幌來幌去、就是按呢。」

中山大學學生，「這淡薄親像消極的補助，應該愛換一个積極的方式，避免這種代誌發生，我感覺按呢治標無治本。」

雖罔學生認為，這項補償金的政策袂䆀，會當宣導莫因為共猴山仔搶物件來著傷，毋過抑是希望，學校會當有其他，親像加強巡邏等等的政策，嘛有民團表示講，人佮猴的衝突，上好的解決方式，就是愛佮猴保持距離，物件愛收予好。

高雄市獼猴共存推廣協會秘書長林美吟，「學校賣飯的所在，餐廳閣有便利商店附近，其實猴攏會佇遐等，所以愛避免這寡代誌，愛先共家己的物件收予好，宣導予好，毋是講我今仔日提錢，共你補償按呢爾爾。」

學校表示講，目前學校的校警隊有成立猴山仔巡守隊，平常時仔攏會巡校園，這項補償金的政策，未來敢欲繼續辦落，學校閣咧研議當中。