今年261例天狗熱 臺南掠湠病蠓開300張罰單
發布時間：
更新時間：
五六月進入天狗熱的流行期，最近各地頭天氣攏無啥穩定，便若落雨過，常在有所在積水，這嘛是湠病蠓密度指數夯懸的原因。今年目前到今，全國已經有261人致著天狗熱，各地頭加強防疫，衛生局就呼籲逐家愛提高警覺、加強摒掃，避免天狗熱閣湠開。（此則新聞標題、導言、內文皆為臺語文。）
稽查人員觀前顧後咧巡佗位有積水，像按呢無清好勢病蠓蟲密度指數就會夯懸，臺南市政府四月到六月開出欲三百張的罰單。天狗熱舊年湠甲真嚴重，到今猶是濟濟人放外外，積水容器無清致使生蠓蟲。這陣臺南各區公所捒無仝款的防治措施，北區公所欲免費借民眾天溝棒來檢查水槽，安南區公所是分三階段加強巡查，希望降低產生天狗熱的風險。
在地居民方先生，「以往攏會噴藥仔，但是噴藥仔對逐家有造成真濟無方便，所以逐家對防治的工課，攏會互相厝邊頭尾提醒。」
臺南市安南區區長魏文貴，「里長率領咱的志工，針對幼卵桶指數較懸的所在，周圍來加強巡查，阮公所主管嘛是ﰓ領同仁閣來複查。」
根據統計，今年臺南天狗熱本土佮境外病例計總有28人，若全國也已經累積有261人。衛生局講，雖然臺南各里內攏有囥12个唌蠓仔的桶仔做監測，IN猶是呼籲民眾，黃酸雨季天氣無穩定，落雨了後愛加強摒掃。
巡查人員，「彼積水容器就是民眾較會袂記得，落雨天了後會袂記得，嘛會承著雨水，像這款情形下，若無去共摒就會生天狗熱的病蠓蟲。」
臺南市衛生局副局長林碧芬，「最近登防中心針對高風險場域，佮人口較濟的社區進行孳生源巡查，攏總查著125个積水容器，其中有23个容器生一个病蠓蟲的情形，現場已經有馬上清除嘛開罰單。」
衛生局指出，每冬5、6月是進入天狗熱的流行期，提醒鄉親千萬毋通積水飼蠓仔，避免予天狗熱佇社區滾絞湠開。
洪家馨/編輯
