臺南三股國小台語課程 共情緒議題透入教育

囡仔唸謠兼比動作，咧呈現古早時代，赤牛仔咧犁田使態的模樣，臺南三股國小的臺語課程，老師閣共情緒議題囥入語言教育，起頭先對歌謠內底學情緒臺語詞彙，才閣予囡仔抽情緒卡來認捌各種情緒的背後意涵。透過情緒卡，毋但學著歡喜、幸福佮受氣等，嘛通予in會當用言語表達心內的感覺。

臺南市七股區三股國小囡仔，「老師會教阮唱歌所以足歡喜的。」
 

臺南市七股區三股國小囡仔，「抽著受氣我若受氣攏會蹔塗跤」
 

臺語老師劉惠蓉，「有的人若較閉思、毋敢講出來，有的人是磕袂著就咧受氣，攏無咧顧慮別人，咱愛共情緒表達就是歡喜表現出來袂要緊，但若心情鬱悴就愛敨予開。」


12年國教課綱內底，真注重情緒管理的核心素養。其中，負面的情緒欲按怎來面對？老師講，伊用臺語情緒卡片教囡仔健康處理，就袂予情緒閣較惡化。另外學校嘛參佛光山合作，in每個月會駛雲水冊車來偏鄉學校，提供閱讀的資源，透過繪本來認捌台語文化。

臺南市七股區三股國小主任 陳昭河，「一般閱讀的資料以外，in內底嘛有真濟咱台語文的學習的資料，所以會提供一寡予咱三股國小的囡仔。」

臺南市七股區三股國小校長 王富美，「咱若予囡仔會當引起動機佮興趣，按呢學習起來嘛較有成效。」

用臺語唸謠學情緒的方式，囡仔攏感覺足趣味。臺語老師嘛按算未來的課程，欲tshuā囡仔鬥陣來創作屬於家己的囡仔歌，予in輕輕鬆鬆唱出母語的歌。