動物園保育員明年起月給 照危險性上濟加5千

保育員當咧攢點心，有果子菜蔬，肉等等豐沛的食物，準備欲去飼動物，保育員每工攏佇動物身邊照顧，其實是一件危險的代誌，已經有六七冬經驗的保育員表示，其實in的工課，並無遮爾簡單，除了照顧動物的日常生活，閣愛注意in的需求，無小心就有可能予攻擊。

壽山動物園保育員王宥翔講，「犀牛部份，其實是定定幫伊抹藥仔，其實我嘛足驚，啄著的話無流血，我是感覺真幸運，若是流血的話，我感覺是拄好爾爾，這是我照顧犀牛來講，我感覺有較危險的部份。」

會來做到公立動物園做保育員，攏是對動物有熱情，毋過30冬來，in的薪水佮危險職務加給攏無調整過，高雄壽山跟台北木柵兩個動物園，2年前共同爭取提升危險加給，最近行政院總算通過，待遇會按照保育員所照顧動物的危險性來分三級，會調升至3千到5千摳不等，其中第一級毋但干焦大象爾，閣增加其他有攻擊性的動物。

壽山動物園主任莊絢智說明，「大型的親像食肉動物，像虎、獅仔，閣有大型的巨型動物，攏納入第一級的範圍，對原本的兩千五，調懸到五千。」

若是對動物無真大的興趣，保育員定定攏會做袂落，壽山動物園主任表示，危險加給是in薪水的一部份，透過這擺加薪，勉勵辛苦的保育員。