巴奈頭張全台語專輯 唱出農村社會女性心境

巴奈用充滿感情的厚音，唱出一段袂當予人發現的感情，長期關心人權、環境開發相關議題的歌手巴奈，推出頭一張全台語專輯，目前當咧全臺灣進行巡迴演唱，17來到彰化的賴和基金會，唌袂少人來聽歌

民眾：「巴奈的歌聲足溫柔的嘛足溫暖的，所以我足愛聽伊唱歌的」

民眾：「這改的台語專輯是巴奈老師準備已經十規冬的專輯按呢，算講是以前攏有聽過伊部份的歌曲，感覺講真美麗、真好聽」

巴奈表示，伊細漢佇高雄大漢，佇六歲進前攏是講台語，伊佇台灣四界行踏唱歌的時陣，發見少年輩講台語的人愈來愈少，伊嘛希望大家加講加聽，毋通予家己的母語拍無去

歌手巴奈：「母語就是毋免教你就學會曉，我是有感覺講台語若是無定定講你會生鉎、袂曉用，誠濟臺灣囡仔攏袂曉講矣，我是感覺若是無去矣足可惜的」

這張全台語專輯．是佮金曲獎最佳專輯製作人柯智豪合作，巴奈表示，製作人柯智豪寫的台語歌詞非常文雅，用寫故事、比喻的方式，表達出早年農村社會女性的認份佮內心的稀微