臺灣戲曲中心「神童派對」 百身童仔踩街落地掃

舞台頂毋但有電音三太子，傳統童仔閣會曉跳嘻哈你敢有看過?神童團佇咱臺灣的民俗活動中捷看著，怹的形象活潑、古錐，定定會和民眾互動，扮演賜福的角色。國立台灣傳統藝術中心佇今年"鬥陣趣"的活動，以"神童派對"做主題，這改上無有100身童仔行街路落地掃，閣有市仔和DIY的活動，欲共咱的陣頭辦做嘉年華。

國立傳統藝術中心主任陳悅宜講，「無仝的信仰、有無仝的童仔，所以阮想講趁這个機會，咱嘛共咱臺灣上奧妙，上奧妙的信仰文化，用深入淺出的方式，予逐家攏知影。」


這改的活動除了室外的陣頭表演，佇台灣戲曲中心也有室內的開幕演出，表演元素結合拍鼓、南北管和嘻哈等等，欲予逐家看著陣頭文化創新的能量。今年嘛邀請著"寶島神很大"的主持人來做宣傳大使，向望招民眾做伙來親近陣頭文化。

活動宣傳大使劉胤含講，「你現場就會當看著，毋管是陣頭、傳統的陣頭、抑是創新的陣頭，其實遮攏看會著。」

活動宣傳大使柯大堡說明，「因為這个過程當中，你就會當共囡仔講，這是啥物 太子是啥物神明，抑是講古錐的這尊是啥人，就變做講我加一个，會當佮阮囝、阮查某囝做伙來ﰣ迌，會當佮伊互動的一个物件就著啦。」

今年的活動分做11/11和12兩日的遊行表演，國立傳統藝術中心，除了邀請著文資保存身份的藝陣團體來，猶閣有請幼稚園囡仔所組成的神將、童仔，欲來和逐家做伙鬧熱。