臺南臺語歌詩音樂會 濟團體發表多元創作

現場吟詩：「暗暝的、暗暝的天星滿天邊。」

詩人路寒袖吟唱《春天的花蕊》，是1994年全世界頭一首的臺語競選歌。臺灣的詩歌對早前古典詩行向現代詩，濟濟詩人用臺語來創作。奇蘭園文教基金會頭一改辦歌詩音樂會，邀請臺語界先輩來吟詩，無論是林央敏《毋通嫌台灣》、向陽《阿爹的飯包》，抑是陳明仁《故鄉的田園》，攏是鄉土文學年代真有代表性的作品，予來參加的民眾聽較甲覆覆覆。

詩人路寒袖講：「春天的花蕊是較抒情，毋過用花佮星來向望咱臺灣，會當行向閣較好的境界。」
詩人向陽也講：「透過文人，包括寫詩的、寫散文、寫小說、抑是寫歌詞。會當予咱的臺語會當閣較文雅。」

鹿耳門漁夫蔡奇蘭，自細漢就接觸文學，用臺語創作濟濟詩歌，甚至閣用七字仔來記錄臺灣的歷史。為著傳湠臺語，伊佇府城設奇蘭園基地，除了展示文學作品，閣辦臺語歌詩音樂會，提供逐家一个發表、相佮討論的所在。蔡奇蘭表示，上大的向望就是欲共臺南打造成歌詩的城市，予眾人看著母語的媠。

鹿耳門漁夫蔡奇蘭希望：「看對臺南開始。會當予咱全國來重視詩歌的推展。」

詩包含著文化性、歷史性佮音樂性，活動安排無仝的表演形式，𪜶主要希望阿母的話袂閣烏天暗地，有人做伙共臺語文化的根顧予在。