烏國難民申請臨時保護 匈牙利人道組織鬥相共

濟濟囡仔徛做伙，綴老師一爿跳舞、一爿唱歌，這是匈牙利當地的人道救援組織HIA，所成立的烏克蘭難民囡仔幼兒園，幼兒園成立到今1年左右，目前有35个踮佇匈牙利的烏克蘭難民囡仔、佇遮學習。

HIA幼兒園園長 Irina：「音樂治療佇遮是上重要的代誌，因為這會使幫助囡仔放輕鬆，而且過了較好。」

臺語台記者 郭柏均：「記者這馬佇咧匈牙利上大的國際宗教人道救援組織HIA，伊是幫助烏克蘭難民，因為真濟難民，尤其是囡仔會拄著語言抑是融入社會等等問題，所以也提供語言的教學服務，予難民一寡幫贊。」

拄著戰爭的烏克蘭難民對烏克蘭國內、一直往西爿行，就會到匈牙利，到今已經有超過400萬烏克蘭難民經過匈牙利，離開烏克蘭，有35000人佇匈牙利申請臨時保護身分。但是匈牙利的語言、文化等等，攏參in無相仝，生活是拄著濟濟問題。

匈牙利人道救援組織HIA負責人 Zoltán Sipos：「上大的問題就是語言的無仝，但是猶有其他的代誌，親像蹛的問題閣有按怎得著社會服務。」

烏克蘭難民：「我定定來遮佮烏克蘭人見面開講，我也定來遮得著法律上的協助，也來看志工醫生。」

HIA表示，in目前已經幫助700外个烏克蘭家庭生活，對食食、醫療、法律、教育這寡方面提供幫贊。但是HIA也拄著濟濟挑戰，親像中心本身無法度提供處方藥仔、閣有通予這寡難民蹛的空間也無濟，紲落來會透過參其他組織合作等等方式，沓沓揣出路。