南市推智慧停車 擴大設置停車柱、用APP揣車位

一支一支的智慧停車柱，佇臺南市區濟濟所在攏看會著。臺南市交通局為著欲予民眾閣較好停車，引進智慧停車柱，方便民眾馬上就納停車費，另外嘛佇一般的停車位埋地磁，掌握停車格使用情形。交通局講，設停車柱嘛會當彌補收費人員無夠的問題。

臺南市交通局簡任技正 黃俊傑：「伊會使提供現場隨時的納數，嘛會使提供即時車位的查詢。到目前為止全臺南市有四千支，遮全國規模上大、數量嘛上濟。」

臺南市全市有一萬四千个停車格，交通局對108年開始推動，目前智慧停車柱和地磁的數量，攏總有一萬一千个。交通局表示，覆蓋率已經完成百分之78，目標欲佇明年完成九成。雖罔建置的數量是全國上濟，毋過，民眾煞有無仝的看法。

民眾 鄭先生：「按呢來講是較方便。」

民眾 楊先生：「研究半點鐘，我才發現伊是需要悠遊卡，問題毋是每一个人攏有辦悠遊卡。」

臺南市交通局簡任技正 黃俊傑：「無一卡通、悠遊卡、無方便佇現場使用Line Pay，事實上直接共車開走，仝款會使到超商去補單。」

揣停車位定定愛開真濟時間，交通局嘛推出臺南好停車的APP，內底會使查著佗位有空的停車格，嘛會使掌握著離你上近的公民營停車場，節省民眾揣停車位的時間。