立法院三讀通過 同婚會使共同收養無血緣囡仔

無論是飼囡仔食飯抑是佮囡仔耍，攏看會出滿滿的愛，IN是全台第一个成功收養無血緣囡仔的同志家庭圍爸佮喵爸，佇面冊頂懸，嘛通看著真濟一家伙仔三个人做伙的日常相片，佇這改立法院通過同志家庭通收養囡仔了後，未來真濟同志家庭，嘛會當享受著這款親情。

台灣同志家庭權益促進會秘書長 黎璿萍：「IN總算毋免閣等司法訴訟的流程，會當予囡仔有兩个媽媽，抑是兩个爸爸的親職照顧，這寡囡仔其實攏是經過足辛苦的過程。」

欲領養一个囡仔總算毋免閣愛放棄婚姻。同志家庭權益促進會表示，逐冬至少會接著兩百通以上，諮詢收養囡仔的相關電話。就會當知影真濟同志家庭其實希望有一个囡仔。但是往過佇法律限制下，同志伴侶若欲收養囡仔就袂當結婚，若準已經有一爿有晟養囡仔，伴侶嘛袂當佇法律上做伙有親權，予同志家庭感覺真無公平。

同婚家長 圍爸：「毋免閣煩惱這个代誌。若講有一个意外，一个大人拄著意外過身，囡仔是欲按怎？敢閣愛出養予別人，阮會使予另外一个爸爸抑是媽媽，好好仔繼續照顧囡仔。」

親像這馬欲請育嬰假，是父母攏有權利，毋過圍爸就感概講，像in猶未提著法院勝訴進前，欲請育嬰假、就干焦一個人有權利爾。嘛因為按呢生、減少陪伴囡仔大漢的機會。這改立法院通過同婚收養，也予真濟閣咧等待官司判決的收養家庭，總算免閣提心吊膽，也予一寡等待家庭的囡仔，通有一个溫暖的家。