新竹市中小學營養午餐 一頓也欲起10-15箍

中晝時間學生歡喜咧食營養午餐，毋過紲落去對新的學期開始，新竹市的營養午餐價數就準備欲起價矣，國小每一頓對原底的40調整變 50，國中是調整到55箍。

家長：「一學期其實愛增加袂少錢，若是確實有予囡仔食較好是袂bai2，毋過家長會煩惱，加錢了後敢會食仝款，家長其實會掛慮。」

新竹市長 高虹安：「希望囡仔的營養午餐，會當食好食健康，紲落來阮會繼續進行，營養午餐廠商質量的監督，希望未來收集閣較濟家長參囡仔的意見，來予新竹市營養午餐愈來愈好。」

照按呢算新學期家長一年愛增加千捅箍的支出，新竹市議會民進黨團是提出質疑，新政策除了攏無參家長討論過，而且價數的計算方式嘛攏無公布。

民進黨新竹市議員 陳建名：「到底是按怎計算出增加的費用，另外增加的費用是偌濟用佇提升菜色，偌濟比例是用佇業者的營銷成本。」

民進黨新竹市議員 劉康彥：「黨團是支持營養午餐加錢政策，毋過對討論的過程 閣有徵詢的過程，以及授權各學校會當自由訂出餐費的決策，阮是並無認同。」

市府指出，主要是希望予學生除了食好嘛愛食健康，閣加上原料起價，才會決定調整營養午餐的費用，另外針對經濟弱勢學生的費用是全部補助。