貧惰擘蝦仔殼 小學生3D列印發明"自動擘蝦機"
張君豪/新竹報導
發布時間：
更新時間：
目次
新竹縣新湖國小的學生，利用3D列印技術，做出自動擘蝦仔殼的機器。這項發明嘛得著2023世界青少年發明展。(這條新聞標題、前言是臺語文。)
拍開開關將蝦仔囥入去機器內底，免兩秒鐘的時間，蝦仔殼就擘甲清氣溜溜，這个四角型細細台仔的機器，來自新竹新湖國小六年仔學生的創意，而且閣提著世界發明展的獎項。
學生李亮穎講:「頂懸有一粒mòo-tà會開始對這爿踅，共蝦仔捒對內底入去，因為蝦仔的尻脊骿會卡著這爿的刀片，就會佇蝦仔殼頂面畫出一條縫。」
當初時因為家己貧惰擘蝦仔，閣加上想著身障者若是想欲食蝦仔，應該真無方便擘殼，佇老師的協助之下，設計出這台自動擘蝦仔殼的機器。
學生李亮穎講:「因為我家己無佮意擘蝦仔，看著真濟障礙者無辦法剝擘殼，想講做這个會當幫助真濟人。」指導老師王郁婷講:「用真濟的創意發想，予囡仔去想生活中，佗位有無方便的代誌。」
毋過其實設計過程中，經過幾若擺失敗，誠無簡單才完成，學生靠創意結合科技，予生活更加方便。
張曼亭/編輯
專題｜改造地獄路 台灣行人路為何難行？
