嘉義樂齡中心成果發表 序大展作品.演音樂劇

樂齡中心的序大佇舞台頂表演音樂劇，對故事、動作到妝娗攏是IN家己一項一項沓沓來完成。參與演出的序大講，參加樂齡中心的課程了後，心情身體攏有改變。

民眾 張女士表示：「按呢差足濟，這種生活特別無仝，所以逐家做伙來參加」

戲劇指導老師 陳音茵：「我感覺老序大佮囡仔是仝款的，就是咱用同理心去佮IN鬥陣，IN的心態就會轉變過來，而且參與的情況誠好，包括IN這改表演的道具攏是家己做，我感覺這件代誌誠厲害」

為著鼓勵序大佇樂齡中心學習，嘉義縣16早時， 佇縣政府頭前舉辦樂齡中心的成果發表活動，全縣18鄉鎮的序大，毋但有提作品來展覽，閣準備表演的活動。

嘉義縣樂齡中心主任 黃意萍表示：「樂齡的觀念一直咧成長，人數嘛一直增加。因為逐家愈來愈知影講，對家己食老以後健康老，阮逐冬大概攏有增加兩百个新生，就一冬一冬攏成長，發見愈來愈濟序大，比較會當接受講，樂齡學習是一件誠重要的代誌」

嘉義縣目前65歲以上的人口佔全縣21.4%，今年度18鄉鎮的樂齡中心就服務過9萬2千外个序大。縣政府表示，55歲以上就會當來參加樂齡學習的課程，希望序大透過課程，毋但減慢身體的老化，嘛予心情會當閣較健康。