蔣萬安.陳時中拚拜票 黃珊珊說新創投資政見

佇市場內底參民眾搏感情，國民黨臺北市長參選人蔣萬安的行踏計畫十二來到最後一站，佇南港的成德市場繼續爭取市民的支持。

國民黨臺北市長參選人蔣萬安表示：「我想我按呢行踏，會閣較了解市民朋友in的想法，包括商圈欲按怎振興，市場欲較緊改建，包括魚市場的環境等等，我想遮的攏是透過行踏，捷行基層，得著上大的收穫。」

另外一爿，民進黨參選人陳時中是來到內湖，頭一擺徛路口拜票，嘛為年底18歲公民權修憲公投催票。毋過，邊仔大樓的居民煞對窗仔內底喝吵。

民進黨臺北市長參選人陳時中表示：「當然咱聲就共伊放較細的，我想各黨攏會按呢做，咱共聲放較細咧，莫去影響著逐家。」

十二無黨籍參選人黃珊珊發表新創政見，邀請過去佇市政府輔導過的業者，證明伊對創新創業的支持。伊進一步表示，未來若當選市長，會納入補助文化產業、強化佮國際的接觸、提懸對新創投資的資金規模。伊講目前相關的投資法案已經送議會審查，毋過煞予國民黨議員擋牢咧。

無黨籍臺北市長參選人黃珊珊表示：「阮欲編遮爾濟的預算，確實是需要慎重，毋過預算已經過矣，法案干焦需要投資兩个字加入去爾爾，全部的投資審議，未來的評選，遮的攏會有公開的機制，但是法案毋通過，連這个開始的機會攏無。」

黃珊珊講蔣萬安嘛重視新創，呼籲國民黨的市議員嘛愛支持這个政策。