推廣趣味學臺語 學者出版入門文法冊解破

台語的句法和詞彙比較,講起來萬底深坑,台文學者劉承賢這十年外綿爛整理、做語言比較,最近和出版社出一本紹介台語句法的入門冊,用古錐的插圖和趣味的例句,希望唌閣較濟人來感受台語的濟變化和世界的牽連。

掃QR code就通聽著做這唸這句「食飯飽、啉酒醉,袂講做食飽飯、啉醉酒」台語詞句,也通知影原來台語的句法遮多變。

台師大台文系副教授劉承賢講:「我就是欲寫予一般對台語可能會曉講,毋過對台語無啥物概念,對語言學完全毋捌的人。」
 

就連台語詞彙多音多義的特色也有收,華語孤一字「癢」,台語有癢tsiūnn佮擽ngiau,硬,台語有tīng、硬ngē的講法,找、揣tshuē和找tsāu,遮攏是台師大台文系副教授劉承賢十外年的觀察和整理。

台師大台文系副教授劉承賢表示:「共所有的例句攏盡量套冷智識,予人咧讀的時陣,上無有一寡點會當較心適淡薄仔。」

五花鹽編輯長凌可樂分享講:「阮共所有佮文法相關的物件,攏用細字藍色的字囥佇邊仔,這攏是一種畫重點的做法,就算你原本對台語無了解,對語言學也無研究的人,看起來伊就誠友善,就會感覺我敢若嘛看有。」

欲成功結合語言學和台語,出版社講一定愛貼近少年人的生活,in用大約一年和劉承賢討論,換趣味的例句,也用古錐的插圖,予台語句法的入門冊,時行閣鑠奅。

台師大台文系副教授劉承賢:「我刁工提足濟語言來比較,企圖就是希望台語是一个世界的台語、現代的台語,伊毋是佇咧固定的範圍內底,固定的框殼內底。」

對韓語、德語、加拿大原住民語到日語等等,斟酌和台語句法做比較,劉承賢講只希望跳脫過去學台語揣本字、標聲調的方式,予閣較濟人會當體會語言就是文化,伊佇咱的生活、無國界。
 

全台敬老金大調查

相關新聞